წლის საუკეთესო პრეზენტაციების წარდგენა

სსიპ ქალაქ ქუთაისის №14 საჯარო სკოლაში გაიმართა ინგლისური ენის მიმართულებით წლის საუკეთესო პრეზენტაციების წარდგენა, რომელშიც მონაწილეობდნენ საბაზო და საშუალო საფეხურის მოსწავლეები. მოსწავლეებმა ინგლისურ ენაზე წარმოადგინეს პრეზენტაციები მრავალფეროვან და აქტუალურ თემებზე, მათ შორის: საქართველოსა და ფინეთის განათლების სისტემების დადებითი და უარყოფითი მხარეები, მოზარდთა ფსიქოლოგია, თანამედროვე ტექნოლოგიებისა და ხელოვნური ინტელექტის გავლენა საზოგადოებაზე, ასევე საქართველოსა და დიდი ბრიტანეთის ისტორიული პარალელები სხვადასხვა ეპოქაში. აქტივობის მთავარი მიზანი იყო მოსწავლეთა საკომუნიკაციო, კვლევითი და პრეზენტაციის უნარების განვითარება, ინგლისურ ენაზე საკუთარი მოსაზრებების არგუმენტირებულად გამოხატვა, ასევე თანამშრომლობისა და გამოცდილების გაზიარების ხელშეწყობა სხვადასხვა ასაკობრივი ჯგუფის მოსწავლეებს შორის. ღონისძიებამ შექმნა სივრცე, სადაც მოსწავლეებმა ერთმანეთს გაუზიარეს ცოდნა, იდეები და კვლევის შედეგები, რაც მნიშვნელოვნად უწყობს ხელს კრიტიკული და შემოქმედებითი აზროვნების განვითარებას. აღნიშნული ინიციატივა სკოლაში პირველად განხორციელდა და სრულად შეესაბამება ეროვნული სასწავლო გეგმის პრინციპებს, რომლებიც ორიენტირებულია მოსწავლის აქტიურ ჩართულობაზე, თანამშრომლობით სწავლებასა და მრავალმხრივი კომპეტენციების განვითარებაზე. ღონისძიების წარმატებამ კიდევ ერთხელ დაადასტურა მსგავსი აქტივობების მნიშვნელობა სასწავლო პროცესის გამდიდრებისა და მოსწავლეთა მოტივაციის ამაღლების თვალსაზრისით. სკოლა გეგმავს აღნიშნულ პროექტს სისტემატური ხასიათი მისცეს და მომავალში მასში ჩართოს სხვა სკოლების მოსწავლეებიც, რაც შექმნის გამოცდილების გაზიარების, კულტურათაშორისი დიალოგისა და საგანმანათლებლო თანამშრომლობის კიდევ უფრო ფართო შესაძლებლობებს. მსგავსი ფორმატის შეხვედრები ხელს შეუწყობს მოსწავლეთა აკადემიურ და პიროვნულ განვითარებას, საერთაშორისო ხედვის ჩამოყალიბებასა და 21-ე საუკუნის უნარების გაძლიერებას.